ཞི་ཅིན་ཕིང་གི་རྒྱལ་ཁམས་མེད་པར་འགྱུར་ངེས་ཡིན་པའི་འབོད་ཚིག་དང་སྦྲགས་ནས་ཁོ་པ་ཨ་རིར་སླེབས་འགྱུར་ངོ་རྒོལ་བྱས་འདུག

རྒྱ་ནག་གི་སྲིད་འཛིན་ཞི་ཅིན་ཕིང་དེ་རིང་ཨ་རིའི་ནང་དུ་གཞུང་འབྲེལ་འཚམས་གཟིགས་ལ་སླེབས་གཏན་ཁེལ་བ་དང་བསྟུན། ཁ་སང་བོད་རང་བཙན་སློབ་ཕྲུག་ཚོགས་པའི་གཞོན་སྐྱེས་ལས་འགུལ་བ་བསྟན་འཛིན་རྣམ་རྒྱལ་ལགས་ཀྱིས་རྒྱལ་ས་ Washington DC ནང་དུ་གློག་གི་ལྕགས་ཧྲེང་སྟེང་ Dictator Xi your empire will fall. Free Tibet འམ་དབང་ཆ་སྒེར་འཛིན་པ་ཞི་ཅིན་ཕིང་ཁྱེད་ཀྱི་རྒྱལ་ཁམས་མེད་པ་འགྱུར་ངེས་ཡིན། བོད་རང་བཙན། ཞེས་ཚིག་བརྗོད་འཁོད་པའི་འཕྲེད་དར་འཕྱར་བའི་ཐོག་ནས་ཞི་ཅིན་ཕིང་ལ་ངོ་རྒོལ་གྱི་རྣམ་འགྱུར་ཤུགས་ཆེ་བསྟན་འདུག དེ་ཡང་རང་ལོ་ ༢༠ ཡིན་པའི་བོད་རང་བཙན་སློབ་ཕྲུག་ཚོགས་པའི་ལས་འགུལ་བ་བསྟན་འཛིན་རྣམ་རྒྱལ་ལགས་ཀྱིས་ཁ་སང་སྔ་དྲོ་ཨ་རིའི་རྒྱལ་ས་ཝ་ཤིང་ཊོན་ DC ནང་གྲོས་ཚོགས་ཀྱི་ཉེ་འཁྲིས་སུ་གློག་གི་ལྕགས་ཧྲེང་ཞིག་གི་སྟེང་། ཞི་ཅིན་ཕིང་ལ་གོང་དུ་བརྗོད་པའི་ངོ་རྒོལ་གྱི་ཚིག་སྦྱོར་འཁོད་པའི་འཕྲེད་དར་འཕྱར་བ་མ་ཟད། ཆུ་ཚོད་གཉིས་དང་ཕྱེད་ཀ་ཙམ་གྱི་རིང་ལ་གློག་གི་ལྕགས་ཧྲེང་དེའི་སྟེང་ནས་བོད་ཀྱི་རྒྱལ་དར་འཕྱར་དེ་ཞི་ཅིན་ཕིང་ཁྱེད་ལ་དགའ་བསུ་མེད། བོད་རང་བཙན། རྒྱ་ནག་བོད་ནས་མར་རྒྱུག་ཅིག བོད་རྒྱལ་ལོ། བོད་རང་བཙན་རྒྱལ་ལོ་སོགས་ཀྱི་འབོད་ཚིག་བསྒྲགས་ཏེ་ངོ་རྒོལ་སྐད་འབོད་གནང་འདུག དེ་རྗེས་སྔ་དྲོ་ཕྱག་ཚོད་ ༡༠།༣༠ ཙམ་ལ་ཉེན་རྟོག་པའི་མོ་ཊ་བཅུ་ཙམ་སླེབས་ཏེ་ཁོང་དོ་དམ་བྱས་འདུག །ཡིན་ནའང་ད་ལྟའི་ཆར་ཁོང་གློད་བཀྲོལ་བཏང་ཟིན་ཡོད་པ་རེད་འདུག སྤྱིར་སང་ཕྱི་ཚེས་ ༢༤ ཉིན་ཨ་རྒྱ་གཉིས་ཀྱི་སྲིད་འཛིན་མཇལ་མོལ་སྐབས་དབུས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག །ཨ་རིའི་ས་ཕྱོགས་གང་ས་དང་ཁེ་ན་ཌ་སོགས་ནས་ཕེབས་པའི་བོད་མི་ལས་འགུལ་བ་རྣམས་ཀྱིས་རྒྱལ་ས་ཝ་ཤིང་ཊོན་དུ་རྟེན་གཞི་བྱས་པའི་རྒྱ་ནག་གཞུང་ཚབ་ཁང་ལས་ཁུངས་མདུན་དུ་ངོ་རྒོལ་སྐད་འབོད་དང་ཨ་རིའི་གྲོས་ཚོགས་ཀྱི་ཚོགས་ཁང་བར་རྔམ་སྟོན་ཁྲོམ་སྐོར་གྱི་ལས་འགུལ་སྤེལ་རྒྱུ་རེད་འདུག  །མ་ཟད་སང་ཉིན་སྲིད་འཛིན་གཉིས་མཇལ་འཕྲད་སྐབས་ཤར་ཏུར་ཀི་སི་ཐན་གྱི་ཡུ་གུར་ལས་འགུལ་ཚོགས་པ་ཁག་གཅིག་ནས་ཨ་རི་སྲིད་འཛིན་ལས་ཁུངས་ཀྱི་མདུན་དུ་ངོ་རྒོལ་སྐད་འབོད་ཀྱི་ལས་འགུལ་སྤེལ་རྒྱུའི་གསལ་བསྒྲགས་གནང་འདུག ཐེངས་འདིའི་ཞི་ཅིན་ཕིང་གི་ཨ་རིའི་ཕྱོགས་བསྐྱོད་དང་འབྲེལ། འདི་ག་རླུང་འཕྲིན་ཁང་ནས་དེ་རིང་སྔ་དྲོ་བཞུགས་སྒར་དུ་བོད་མི་རིགས་ཀྱི་ངོ་བོ་གཅེས་སྲུང་གི་གཟའ་འཁོར་ཞེས་པའི་ལས་འགུལ་དབུ་འབྱེད་ཀྱི་གསར་འགོད་ལྷན་ཚོགས་ཐོག་སྲིད་སྐྱོང་སྤེན་པ་ཚེ་རིང་མཆོག་ལ་དེ་འབྲེལ་བཀའ་འདྲི་ཞུ་སྐབས་ཁོང་གིས་བོད་མིའི་སྒྲིག་འཛུགས་ཀྱི་ངོས་ནས་ཞི་ཅིན་ཕིང་གི་ཐེངས་འདིའི་ཕྱོགས་བསྐྱོད་དང་དེས་བོད་ཀྱི་གནད་དོན་ཐོག་ཤུགས་རྐྱེན་ཇི་ལྟར་ཐེབས་ཀྱི་ཡོད་མེད་སྐོར་དོ་སྣང་གནང་བཞིན་ཡོད་པ་གསུངས་སོང་། རྩ་བའི་ཞི་ཅིན་ཕིང་ལོ་ངོ་ ༡༠ ཙམ་གྱི་རྗེས་སུ་ཨ་རིའི་ནང་ཐོག་མར་སླེབས་ཀྱི་ཡོད་པ་དང་། སྤྱིར་རྒྱལ་ཁབ་ཕྱོགས་གཉིས་ཀྱི་འགོ་ཁྲིད་དབར་འབྲེལ་ལམ་ཡག་པོ་ཡོད་པའི་སྐབས་སུ་འགོ་ཁྲིད་འཚམས་གཟིགས་ཕེབས་རེ་གནང་གི་ཡོད་པ་དེ་ལྟར་ཡང་། ད་ལྟའི་ཆར་ཨ་རྒྱ་གཉིས་དབར་ཚོང་དང་འཕྲུལ་རིག  །ལྷག་པར་དུ་མི་བཟོས་རིག་ནུས་ཀྱི་ཚོང་གི་འགྲན་བསྡུར་ཁྲོད་ཞི་ཅིན་ཕིང་ཨ་རིར་མགྲོན་འབོད་བྱས་པ་ཞིག་ཆགས་ཀྱི་ཡོད་ཀྱང་། ཁོ་པ་ཨ་རིར་མ་འབྱོར་སྔོན་ཚུད་ནས་བོད་མི་གཙོས་པའི་རྒྱ་རིགས་དང་ཡུ་གུར་མི་རིགས། ཧོང་ཀོང་། སོག་པོ་སོགས་རྒྱ་ནག་གི་དབང་འཛིན་འོག་གདུག་རྩུབ་མྱངས་དང་མྱོང་བཞིན་པའི་མི་རིགས་ཀྱི་མང་ཚོགས་རྣམས་ནས་ཞི་ཅིན་ཕིང་ལ་ངོ་རྒོལ་གྱི་རྣམ་འགྱུར་གསལ་པོ་སྟོན་བཞིན་པ་མངོན་རྒྱུ་འདུག མ་ཟད་ཉེ་སྔོན་ཟླ་བ་འདིའི་ཚེས་ ༡༢ ཉིན་ཞི་ཅིན་ཕིང་རྒྱ་གར་རྒྱལ་ས་ལྡི་ལིའི་ནང་དུ་ BRICS ལྷན་ཚོགས་དང་འབྲེལ་ནས་སླེབས་སྐབས། བོད་མི་ལས་འགུལ་བ་བརྒྱ་ཕྲག་མང་པོས་ཞི་ཅིན་ཕིང་ལ་དགའ་བསུ་མེད་པའི་གཞི་རྒྱ་ཆེ་བའི་ལས་འགུལ་སྤེལ་བའི་ཁྲོད། ལས་འགུལ་བ་མང་དག་ཅིག་སྐབས་དེར་ཉེན་རྟོག་པས་འཛིན་བཟུང་བྱས་པ་ཡང་བྱུང་ཡོད། The post ཞི་ཅིན་ཕིང་གི་རྒྱལ་ཁམས་མེད་པར་འགྱུར་ངེས་ཡིན་པའི་འབོད་ཚིག་དང་སྦྲགས་ནས་ཁོ་པ་ཨ་རིར་སླེབས་འགྱུར་ངོ་རྒོལ་བྱས་འདུག appeared first on vot.